ملحــــــــــــــــــــــمة الشاعر التــبــيــنــاوي

[center بسم الله الرحمن الرحيم
ملحمة مبارك طناء التاريخيه (تعتبر هذي القصيدة تاريخ للجزيرة العربيه )


1. قال التبيناوي حسينات الأمثال = لو زاد موضوعه يزيد أمتثاله
2. لوكان باب القاف من دونه أقفال = فكيت عسرات القفول بسهاله
3. في قدرة المعبود علام الأحوال = ياجاء لزومي ماأنتضرت الوكاله
4. وقت الطلب ماشيب القاف لو طال = أشفق على العسرات وآخذ جزاله
5. أقطف زهرنبت(ن) على سفح شلال = ملفوظ فيض فياض فكري صفاله
6. الشعر له قدره ماهو حكي جهال = تاريخ لأفعال الرجال بعداله
7. هذا الصحيح اللي ماهو هرج دلال = فكره وقلبه للطمع والدلاله
8. وأبداه ترحيب وتحيات وإجلال = من شاعر(ن) بدع المثل راس ماله
9. مني لأهل حائل كريمين الأسبال = وأهل القرى والبدو واللي حواله
10. وباللي لهم في سيرة المجد منوال = أهل الكرم وأهل الوفاء والشكاله
11. إعدادماراحت من أجيال وأجيال = وإعداد من زار الحرم وإنتواله
12. وإعدادماركبوا على كل مشوال = وإعداد ماهل المطر من خياله
13. وأخص به شمر شريفين الأفعال = شمر مثل بدر الدجاء بإكتماله
14. مزبان من ضامه من الضيم ولوال = ياضاق بالدنياء وقل أحتياله
15. من يوم رزق الناس يقصر عن الحال= شمر ربيع الضيف واللي عناله
16. وحائل وأهلها للكرم مضرب أمثال = منها بداء نبع الكرم من جباله
17. دار الكرم من دور حاتم ولازال = رجالها ماعاد يرضى بداله
18. دار الكرم سكانها ترخص المال = كل (ن) بفعل الطيب يرخص حلاله
19. لعل يسقيها من المزن هطال =متكامل (ن) كيله مكائيل كاله
20. يرعد ويلعج بارقه يشعل إشعال = على النفود وضلعها مع سهاله
21. الفكر هاج وهيضه بعض الأحوال= زادت علوم مضيعين الدلاله
22. باليوم يطلع لك ثمانين خيال = كل (ن) جعل نفسه قبيله لحاله
23. خيال دهم وصفر وألوان وأشكال= وكامل قبايل نجد ماهي حواله
24. مره يفصل سيرة المجد تفصال =ومره يفسرها على ماطراله
25. ونشوف مايحدث بتاريخ الأبطال= مايكتب الراوي وصيغة مقاله
26. اللي علينا مانسوا منه مثقال = واللي لنا من فعل يترك مجاله
27. عن ذكر فعل أجدادنا زاد الإهمال =والفعل شاهد والتصنع فساله
28. يجحد تواريخ العرب كل محتال = ناس (ن) تجيب السالفه من خياله
29. ياناس خلوكم نزيهين وثقال =ماهي علوم ضنونكم وأحتماله
30. ماأنت متأكد لك عن الظلم معدال = الصمت حكمه والتخبط رزاله
31. الصدق واضح ماعلى الصدق مدخال = والصدق ماأنتم والحقيقه زماله
32. حذراك ياللي مشغل(ن) حالك إشغال = العلم من دونه نوادر رجاله
33. واللي يقول البدو بالدين جهال= والحضر عكس البدو مابه جهاله
34. أرفع مقامي عنك والعذر بطال = ماهو عذر قولك من الناس قاله
35. مني لمن حاش المدايح بالأفضال =من هام صعبات المرجل يناله
36. يمناك ياللي للمناعير مدهال= شبل (ن) يحوش من المراجل جزاله
37. أعطيك نبذه عن كريمين الأسبال= إجابتي للي تكرر سؤاله
38. قدر السؤال أقول ماني بشمال = والناس كل (ن) دون حقه وماله
39. ماني بذكر الناس ملزم وكفال = ولا أجحد ثنى الطيّب لياجاء مجاله
40. وإلا الطناياء دولة (ن) وقتها زال = يقولها فيصل عسى الخلد فاله
41. شمر تواريخ (ن) جديدات وسمال= قبلي هل التاريخ ماأحصت فعاله
42. تومان سنجاره والأسلم بالإجمال= وعبده هل الشيمه محل الجلاله
43. غلباء هل الردات ياشلهب اللال= أفعالهم ماتنحصي بالسهاله
44. من هجرة اللي خصه الله بالإرسال= خير العباد اللي بعث بالرساله
45. من دور زيد الخيل للخير منهال =سمي بزيد الخير نادر خصاله
46. من نسل حاتم طي وعدي نزال = بجبال طي وقبر حاتم قباله
47. بعد وفاة المصطفى صار الإغفال =وكثير ناس إرتد نحو الضلاله
48. إلا اللذي من طي ماإرتد رجال = عن سيرة محمد وصحبه وآله
49. وفي قرن رابع عقد رابع بالأطلال = بني صخر فيها وتسكن تلاله
50. وفي قرن سادس عقد ثالث بني هلال= وبني هلال غربت في حلاله
51. ثم الفضول إستشملت غرب ترحال = مابين الأردن والعراق إرتحاله
52. وست ميه وسته وخمسون الإخلال =دولة بني العباس صار إحتلاله
53. وأزدادت الفوضاء والإحباط ينهال = والخوف حل بنجد واللي حواله
54. ولا أستعاد الحال من بعد مامال = إلا اللذي من مصر جيشه مشاله
55. أعظم حدث سجل على مر الأجيال = سلطان غطز من المماليك ناله
56. هزم المغول وعاد بغداد وإنجال = ضياع كامل نجد واللي تواله
57. آخر عقد من قرن ثامن وبالأجبال= فيها الضياغم ماضيات فعاله
58. ردوا لموطنهم بعد طول تجوال =من نسل قحطان أبو يعرب أصاله
59. من طي بن كهلان ضيغم والأشبال = ضياغم مايزحم الضد جاله
60. وبهيج من عقده زبن طيب الفال = دخل بمردان إبن ضيغم دخاله
61. قال السلامه يوم تغني عن المال = آخر عقد من عقد تاسع زواله
62. من فعل سنعوس ومعه حلف الأبطال= شمر هل الفزعات ياجاء مجاله
63. سناء سناء نبت (ن) ولو ماله أكال = من عيس من قوم (ن) كثير حلاله
64. روّح بهيج السنبسي راعي المال = والشيخ إبن بقار جو إستواله
65. وعلي شكى له جمرة (ن) من ولد خال= النار يبداء بالشرار إشتعاله
66. والخال من ربعه شكاء ضيقة البال = وإبليس جت له فرصته وأحتياله
67. الشيخ وإربوعه مشوا دون عذال =يبغون جو بقو ماهي جماله
68. عيا به الشايب بعد فعل وقتال= والخال وآفاه القدر بالعجاله
69. واضح هدف من قال في غيبة الخال = صفق الدغيري بالوهب والطواله
70. دنيا مشاكلها عريضات وطوال = ولولا الخطاء ماصار شرع وعداله
71. وعلي تعلاء وإعتلاء عالي العال = علي لأجل دمعة شًرًف عاف حاله
72. يقول مايصبر على الظيم رجال = وأنا إبن ضيغم مايطبون جاله
73. تزييف تاريخ(ن) مضاء عيب وهبال= على مدوّرة الفتن مستحاله
74. ومن قال شمر شمرين وله أوصال = تبت يدين اللي يريد إنفصاله
75. عهد(ن) تواصو به كريمين الأسبال= على الخلف نهج السلف راس ماله
76. وعلي عياله ستة أولاد عيال =وقت الغضب وإلا الرضاء حي فاله
77. جلمود وجليميد وحسين وأشبال= دهمان وعليان وغانم عياله
78. والدهم السابع ولا حوله أزوال= دغيرات باللقوّات يضهر جماله
79. حبس الجبل يازلزل القاع زلزال = روس الطناياء مزبنت من عناله
80. نعم دغيرات الجبل مابه جدال = بخشوم صنع البنت ماهي ختاله
81. كل (ن) عرف مرماه من قبل شوال =هدف(ن) ضرايبهن سريع(ن) زواله
82. (الناس تدري بالجدايد والأسمال ) = قبلي يقوله من كلامه دلاله
83. وخيل (ن) يصارعن الأعنّه للأقفال = جبناه يوم (ن) مثل جوخاء خياله
84. خيل الشريف منيهات(ن) بالأطوال= خزيزة الخيال نأخذ جزاله
85. فريس عبدة مذهبة كل خيال = ياما خذو من طيبات السلاله
86. ويامن جهلت العلي تبشر بالإذلال = دمي على شمر سريع أنفعاله
87. وقت الغضب عندي دوى كل من عال= سنايدي مايزحم الضد جاله
88. كانه عدم عرف بتفاصيل الأحوال = خذ مني الموروث صدق ودلاله
89. العلي تاريخ (ن) توارثه الأجيال = ماكل عصمان الشوارب قواله
90. وإبن رشيد وعلي من صلب رجال= من صلب مغوار(ن) عمامه خواله
91. الضيغمي ستر اللذي تلبس الشال = عوق العديم ليا أعتلاها جفاله
92. من روس شمر زبن مقطوع الآمال =شمر ليا أشتد الوطيس أشتعاله
93. الضيغمي زيزوم غلباء لياقال = شمر جميعه ماتخالف مقاله
94. ضياغم (ن) يازلزل القاع زلزال = حبس الجبل والعين تبخص حلاله
95. من شجرتن خضراء لها في وضلال= بيت الشرف دم الشريف إنتماله
96. ثلاثمائه وخمسون وعامين بإكمال = وإبن علي شيخ الجبل من خلاله
97. للعلي بأعلاء ذروة المجد منزال = روس الطناياء مزبنت من لجاله
98. في عام تسع مائه وخمسه لها حال= شيخ الجبل علي(ن) وبعده عياله
99. علي ثلاث عقود والشيخ فعال = علي كبير العلي شيخ الشكاله
100. من بعد والدنا علي فيه عيّال =حر (ن) ولد حر(ن) يعوضك بداله
101. في قرن عاشر عقد رابع فلا زال= إبن علي صالح حكيم (ن) زهاله
102. عامين من غيرالثلاثين تفصال = وعبدالمحسن الصالخ نهّض وإستواله
103. عشر وثمان سنين عهده بالإجمال= وبعده مهناء بن حسين إرتكاله
104. عامين من غير الثلاثين شغال =وعلي الثلاثه والثلاثون طاله
105. وعيسى علي خمس وثلاثين وأمثال = محمد مثيله بالعدد وأكتماله
106. وعشرسنوات وخمس فايز له أفضال = وعبدالمحسن الفايز تولى مجاله
107. سبعه وعشرين(ن) وعشره بالإكمال = ومحمد العيسى بعقل وثقاله
108. أربع وعشرين(ن) وعشره والأطوال = ضًفّه شمال ليا الشرارات ناله
109. الأشمل المعروف والإسم دلال = شيخ الدهى والدين ضد الضلاله
110. محمد العيسى على الجهل زلزال = ناصر هل الدعوه جهاد وبساله
111. مذهب جيوش الترك قصاف الآجال = ذبح ثلاثميه لنصرة رجاله
112. فك الحصار عن إبن وهاب بالحال = من الترك لأجل الدين واللي دعاله
113. إبن علي وإسمه على القبر لازال = مكتوب إمام المسلمين لنضاله
114. محمد بناءبرزان ساسه والأميال = برزان كم شيخ (ن) وشيخ(ن) لجاله
115. وبعده محمد لكن الوقت ميّال = ياكثر ميلات الزمن وأعتداله
116. محمد عبدالمحسن علي وقت الإمحال = الدار خمس سنين غبرن لياله
117. الشيخ أخو خنساء للأثقال نقال =كريم والسمن العرابي مثاله
118. لولا أخوخنساءراحت شيوخ وأطفال= ولحقت على أجواد(ن) تردت حواله
119. ضف اليتاماء والأرامل وكهال =والجار واللي جور بقعاء جراله
120. غير اللذي لحقه من الجوع سلال= تعتاش خلق الله بعيشة عياله
121. عشر وثمان وفوقهن عشر مامال =بعقل (ن) وثقل وقدرته وأحتماله
122. وصالح عبدالمحسن لما كاد حمال =ستة عشر عام (ن) بعزم وصماله
123. وقي عقد ثالث قرن ثالث عشر حال= الشاعر مبيريك بانت فعاله
124. من دون دم الوجه ضحاء بالأبطال = فريح ومفرح نوادر عياله
125. عن أولاد علي (ن) قال ماندفع المال= ماندفع الخاوّه لأحد مستحاله
126. يوم أشملت شمر وقف موقف أبطال = في صف أخو سلمى بعزم وبساله
127. راع المناخ اللي شرب كل فنجال =مفتاح أخو سلمى بقوة رجاله
128. قالوا جبلنا مالنا عنه مرحال = واللي نوا الممشاء لنا الله بداله
129. أبو فريح لغفوّة القلب نشال = وأبو ريوف أثقل رواسي جباله
130. ميقاف جاب أخوان نوره يالإعجال = بالليل كل(ن) جاء بنفسه لحاله
131. ولحقوا من الحجلان مجموعة أبطال =دم الحمية ساقهم بالعجاله
132. ومسلط وإبن سلطان ماضين الأفعال = وإبن الشرف عدوان شيخ الطواله
133. والفارس مبيريك للحمل شيال = هم المعادي سطوّته وإنفعاله
134. منه العواجي يسكب الدمع همال = قال التبيناوي لقاء شف باله
135. والومد قاله بالمثل ضمن ماقال = جتنا جموعك يامبيريك عاله
136. وإبن قويفل قال زال الخطر زال = يرعى جملنا مطلقينن عقاله
137. حتى غدت ذروة سنامه تقل جال = بين العرب تايه على ماطراله
138. وماقاله الهقاز دايس بالأمثال = لعل دايس بالنعيم وضلاله
139. من يوم دايس بين الأبطال جوال= عدد وصايف كل جمع(ن) لحاله
140. كسب التبيناوي جمل نوت ودلال= كيف العواجي والنجر والزماله
141. والصدق مايزعل من الناس عقال = حتى الجهيلي وضحه في مقاله
142. صارت براس عقاب شيال الأثقال =من ضربة مفيز العفر يوم شاله
143. ومشاري الشقاق لحجاب قتال = فوات قبل مدورين الجماله
144. والمرتعد من كف دوشق بالإعجال= مسًكٍت صياح الورع ماهم بحاله
145. خيالة الصوت المتلٍي بالأفعال =لعيون هيفاء عن شجاع (ن) غداله
146. ومزعل غداء مابين هايس وخيال =وبالقول خيال القدورات طاله
147. وعيسى عبيدالله حكم بس ماطال = سبت خلاف(ن) بين عم(ن) وخاله
148. عامين به كل المصائب والأهوال= وافق مشاكلها بسو أحتماله
149. وسنه ونصف وكايد الكود يكتال= وأبو طلال إبن الرشيد إرتكاله
150. إبن الرشيد عبيد وأخوه صوال = عبدالله اللي كون قمعه حكاله
151. أبو طلال أعلن تفاصيل الأحوال= الشيخ عبدالله تزعم عياله
152. وعبيد للعدوان هم (ن) وغربال =فيه الشجاعه والكرم والزعاله
153. وإلا أخو نوره منه الأبطال تهتال= شيخ (ن) تشرف سيرته من قراله
154. وفي عقدسادس قرن ثالث عشر هال= من بعد عبدالله طلال إنتخى له
155. وبعده حكم متعب وحولين ماحال =وحولين مثله بندر(ن) مابقاله
156. وإبن الرشيد محمد(ن) طلق الأشمال =عشرين عام وست جوّد حباله
157. سموه بالمهاد تمهيد الأطوال =من مثل تلك التوسعه مستحاله
158. من الشام للبصره تسلمه الأموال= لجده لياالطايف لنجد بكماله
159. لغربي مصر لحدود الأتراك بأميال= واللي رفض دفع الزكاوي غزاله
160. سموه إسم خيران خيراته جزال =والمصطفق يصفق على ماطراله
161. معه حمود عبيد للكود حلال= يقلط على حوض المناياء لحاله
162. وألف وثلاثميه وخمسة عشر شال = عبدالعزيز إبن الرشيد إعتزى له
163. هزيمته لإبن صباح أضهرت حال= والشيخ في كون الصريف إنشغاله
164. وإلا الجنازه كنه الموت مرسال = من قبل عشرسنين صار إغتياله
165. وبعد الجنازه متعب (ن) بس ماطال = شهور قبل الحول تكمل لياله
166. وبعده عيال حمود والقلب ياشال =على اللحم والدم شتت وصاله
167. بان إختلاف الراي وهروج الأنذال= ثالث سنه وأوضاعهم ينرثاله
168. بعد عيال حمود وظروف الإشكال =شاله سعود أبو خشم وإرتكاله
169. وفاة زامل خلخلت كل الأعمال = هو قايد القوات لحظة قثاله
170. زامل من أبطال (ن) يشيلون الأثقال = الشيخ إبن هو راس ماله
171. وسعود عشر سنين وافته الآجال = وعبدالله المتعب شهور ولياله
172. وبعده محمد بن طلال (ن) ولا طال= بالصلح مع عبدالعزيز بسهاله
173. من حصله يستاهله والجهل زال =والملك ملك الله عظيم الجلاله
174. والناس كلن دون حقه له أفعال= قبايلن به حقها من رجاله
175. كم خيّرن لامر طاريه بالبال =يبعد هموم القلب ياجاء مجاله
176. ياما من الأبطال والصدق ينقال = جنوب شرق وغرب وألا شماله
177. أهل الوفاء والطيب من كل الأشكال =من هام صعب المرجله حي فاله
178. ماقوله أرجي جمع دينار وريال = ولالي على قول الحقيقة جماله
179. واللي زعل يصفق براسه على الجال= إثبات واقع ماضيات (ن) لياله
180. الله يديم الأمن في ضل الأبطال= آل السعود محكمين العداله
181. للشعب عز وخير وأنعام وآمال= القادة اللي نلتجي في ضلاله
182. الله جعل فيهم عن الضيم مدخال= أولاد عود (ن) كايد الحمل شاله
183. عاصر لياليها الصعيبات بأفعال = أنهى مشاكلها وطوّع جماله
184. صفى قلوب الشعب من سو الأعمال= أقام شرع الله ووصى عياله
185. خلّف صناديد(ن) على قلب رجال = للواقع الحاضر كبير الدلاله
186. الخير عم المملكه كل الأشكال =الحمد لله والشكر والثنى له
187. طالبك يامنزل تبارك والأنفال = عبدك وإبن عبدك عليك إتكاله
188. منجي سفينة نوح من غب الأهوال= يامن شفيت أيوب من سوحاله
189. تمهل ولا تهمل ولو طال الإمهال= يارب عبدك لاتخيّب سؤاله
190. إنك تعز اللي للأجواد مدهال = والمملكه واللي بخير(ن) سعاله
191. ميه وتسعين وثلاثه بالإجمال = وأرجو السموحه في ختام الرساله
192. أزكى صلاة الله على خير مرسال= شفيع الأمه يوم تحصى عماله
193. صلو عدد ماهل من يوم وهلال= على رسول الله وصحبه وآله
وتقبلوا تحيات الشاعر/
مبارك طناءمبيريك التبيناوي


صـــــــــــــــــــــح السانك ::تحياتي[/center]